Kuri uyu wa gatanu tariki ya 22 Ugushyingo 2024, shampiyona y’abakozi (ARPST) iraba yagarutse hakinwa imikino yo kwishyura ya 1/4 mu mupira w’amaguru ndetse no mu yindi mikino itandukanye.
Iyi mikino yo kwishyura ya 1/4 muri shampiyona y’abakozi (ARPST), iteganijwe kubera ku bibuga bitandukanye bya hano mu mujyi wa Kigali, Mu gihe indi mikino iza kubera mu karere ka Bugesera ndetse n’akarere ka Kamonyi.
Mu mikino iteganijwe gukinwa uyu munsi, harimo umukino ukomeye uraza guhuza ikipe ya RBC itozwa na Banamwana Camarade iraba yasuye ikipe ya RBA itozwa na Kwizigira jean Claude ku kibuga cya Cercle Sportif mu Rugunga ku isaha ya saa cyenda n’igice, umukino ubanza wari warangiye ikipe ya RBC itsinze ikipe ya RBA ibitego 2-1.
Bamwe mu bakinnyi twaganiriye b’ikipe ya RBA, baravuga ko intego ntayindi ari ugusezerera ikipe ya RBC bakerekeza mu mikino ya 1/2, ngo kuba baratsinzwe ibitego 2-1 mu mukino ubanza bitabateye ubwoba ko ahubwo impamba y’igitego batsindiye hanze iraza kubafasha cyane kuko baramutse batsinze RBC igitego 1 bahita bayisezerera.
Ku ruhande rw’ikipe ya RBC, abo twaganiriye baravugako umwuka ari mwiza hagati yabo n’ubuyobozi bw’ikipe, aho bavuga ko ikizere cyo gutsinda umukino wa RBA ari cyose ariko badakwiye kwirara kuko ikipe bagiye gukina nayo itoroshye kuko yababonyemo igitego ku mukino ubanza bari bayakiriye gusa ngo intego bafite n’ugutsinda umukino w’uyu munsi bakerekeza mu mikino ya 1/2.
Undi mukino uteganijwe gukinwa kuri uyu munsi, ni umukino uraza guhuza ikipe ya RMS iraza kuba yakiriye ikipe ya RWANDAIR kuri stade ya Mumena saa cyenda n’igice, Aho mu mukino ubanza ikipe ya RWANDAIR yari yatsinze RMS ibitego 2-0, mu mukino wari wabereye ku kibuga cya EACC Masaka ndetse byitezwe ko iyi kipe y’ikigo cy’ubwikorezi ishobora kuza kongera gutsinda nkuko byagenze mu mukino ubanza bitewe n’abakinnyi ifite ndetse no kumenyera iyi mikino cyane kurusha ikipe ya RMS baraza kuba bahanganye.
Umukino wundi uraza gukinwa, ni umukino urahuza ikipe ya IMMIGRATION iraza kuba yakiriye ikipe ya RISA kuri stade ya Bugesera ku isaha ya saa cyenda n’igice, aho umukino ubanza utari wakinwe ahubwo ikipe ya RISA yari yatewe mpanga y’ibitego 3-0 nyuma yo kutaboneka ku kibuga ndetse ikigaragara nuko ikipe ya IMMIGRATION ifite igikombe cya shampiyona giheruka yamaze kugeza ikirenge kimwe mu mikino ya 1/2.
Undi mukino wa 1/4 uteganijwe gukinwa uyu munsi, uraza guhuza ikipe ya Statistique iraza kuba yakiriye ikipe ya RAB ku kibuga cya Ruyenzi hariya mu karere ka Kamonyi saa cyenda n’igice, umukino ubanza ukaba wari wasojwe ikipe ya Statistique inyagiye ikipe ya RAB ibitego 4-1, nkuko bigaragara iyi kipe y’ikigo cy’ibarurishamibare mu Rwanda yamaze kugeza ikirenge kimwe mu mikino ya 1/2 cy’irangiza.
Biteganijwe ko amakipe abiri azahurira ku mukino wa nyuma muri buri cyiciro azahita abona itike yo kuzerekeza mu mikino nyafurika iteganijwe kuzabera mu gihugu cya Algeria umwaka utaha wa 2025.
