Afurika y’epfo: Abarenga ibihumbi 500 bamaze kwandura coronavirus
Icyorezo cya Coronavirus gikomeje kongera umuvuduko ukabije ku isi yose, kuko imibare yabakomeje kwandura iki cyorezo igenda yiyongera umunsi ku munsi ndetse n’abahitanwa nacyo bagenda baba benshi cyane.
Igihugu cya Afurika y’Epfo ni kimwe mu bihugu bikomeje kugira umubare munini w’abantu banduye icyorezo cya coronavirus, aho muri iki gihugu habarurwa abantu bamaze kwandura Covid-19 barenga ibihumbi 500, naho abarenga ibihumbi 8 bakaba bamaze guhitanwa niki cyorezo.
Zwelini Mkhize avuga ko ku wa Gatandatu byabaye ibidasanzwe aho abantu bashya 10,107 ari bo banduye coronavirus, bihita bituma imibare y’abanduye muri iki gihugu igera ku 511,000, naho 8,366 bakaba bamaze guhitanwa na Covid-19.
Nyuma y’uko ibikorwa bimwe na bimwe bifunguriwe, ndetse na gahunda ya Guma mu Rugo ikoroshywa muri kiriya gihugu, imibare y’abandura iragenda yiyongera cyane, kandi harimo kugaragara ikibazo cy’abaganga ndetse n’abaforomo badahagije, kuburyo bafasha mu kurwanya iki cyorezo.
Afurika y’epfo, nyuma y’uko yamaze kugeza ku bihumbi 500 by’abantu bamaze kwandura icyorezo cya coronavirus, yahise iba igihugu cya gatanu ku isi gifite umubare munini w’abanduye iki cyorezo, inyuma y’ibihugu nka Leta z’unze ubumwe z’Amerika, Ubuhinde, Brazil, ndetse n’Uburusiya.
