Amerika: Mbere yo Kurahira Perezida Biden yayoboye umuhango wo kuzirikana abamaze guhitanwa na Coronavirus
Perezida mushya wa Leta Z’unze ubumwe z’Amerika Joe Biden, yaraye ayoboye umuhango wo kuzirikana no guha icyubahiro abantu ibihumbi 400,000 bamaze guhitanwa n’icyorezo cya Coronavirus hariya muri kiriya gihugu, ibi bikaba byabaye mbere y’uko aza kurahirira kuyobora Amerika kuri uyu munsi.
Biden watorewe kuyobora Amerika nyuma yo gutsinda Perezida wari usanzweho Donald Trump, araza kurahira uyu munsi ndetse Trump wari usanzwe ayobora kiriya gihugu akaba yamaze gusezera ku banyagihugu, aho yaraye avuze ijambo rya nyuma ari ku butegetsi ndetse akaba yanatanze imbabazi ku bantu batandukanye barimo n’umuhanzi Lil Wayne.
Joe Biden n’umugorewe Jill bamaze iminsi baravuye aho bari batuye muri leta ya Delaware bagaruka i Washington, aho Biden yamaze imyaka 36 ari musenateri mbere yo kuba visi perezida wa Amerika yungirije Obama kuva mu 2008 – 2016, bakaba baraye bifatanije n’abaturage batuye Amerika mu kuzirikana no guha icyubahiro Abanyamerika bamaze guhitanwa na Covi-19.
Perezida Joe Biden araza kurahirira kuyobora Amerika mu buryo budasanzwe kuko kuri ubu Washington icungiwe umutekano cyane kurusha ikindi gihe cyose, abapolisi n’abasirikare benshi bari mu mujyi ndetse inzu ya Perezida w’Amerika izwi nka White house ikaba yazengurukijwe ibyuma byinshi cyane mu rwego rwo kuyirindira umutekano.
Bikaba biteganijwe ko uyu muhango uza kwitabirwa n’umubare mucye w’abantu, mu rwego kwirinda ndetse no gukumira icyorezo cya Coronavirus gikomeje gukaza umurego muri kiriya gihugu, abandi bakaza gukurikira uyu muhango w’irahira rya Biden ku mbuga nkoranyambaga.
