Uganda: Abasirikare bagose ibiro by’ishyaka rya NUP ribarizwamo Bob Wine
Mu gihugu cya Uganda, ingabo za Leta zagose inzu ikoreramo ishyaka rya Bob Wine, mu gihe hategerejwe umunsi w’irahira rya Perezida Museveni watsinze amatora aheruka kuba muri kiriya gihugu.
Nkuko amafoto yakomeje kugenda acicikana ku mbuga nkoranyambaga zitandukanye, yagaragaje abasirikare benshi ndetse n’imodoka z’intambara zagose inzu isanzwe ikoreramo ishyaka rya National Unity Platform (NUP) ribarizwamo Depite Bob Wine wari uhanganye na Perezida Museveni mu matora y’umukuru w’igihugu aheruka kuba muri Uganda.
Igotwa ry’ibiro by’ishyaka rya National Unity Platform (NUP), ribaye mbere y’uko ku munsi wejo kuwa gatatu tariki ya 12 Gicurasi 2021 mu gihugu cya Uganda hategerejwe irahira rya Perezida Yowel Kaguta Museveni watsiinze amatora yabaye muri kiriya gihugu mu mezi macye ashize, aho yatsinze Depite Bob Wine bari bahanganye muri ayo matora y’umukuru w’igihugu.
Ishyaka National Unity Platform rya Bobi Wine rifite icyicaro ahitwa Kamwokya mu nkengero za Kampala.
Umuhango w’irahira rya Perezida Yowel Kaguta Museveni, biteganyijwe ko ushobora kuzitabirwa n’abakuru b’ibihugu barenga 20, nkuko ikinyamakuru Daily Monitor cyabitangaje.
